بعد 13 سنة من طلاقي. حكايات ميراا
فضلت واقفة قدام باب القاعة، والموبايل في إيدي.
قرأت الرسالة مرة.
واتنين.
وتلاتة.
“لو كريم عرف الحقيقة كاملة، مش هيسيبكم تخرجوا من البلد تاني.”
رفعت عيني ناحية القاعة.
كريم كان لسه واقف مكانه.
لكن عينه كانت بتدور عليّ.
كأنه حس إن في حاجة حصلت.
قفلت الموبايل بسرعة وحطيته في شنطتي.
آدم لاحظ.
“ماما، في إيه؟”
ابتسمت رغم التوتر اللي بدأ ينتشر في جسمي.
“مفيش يا حبيبي.”
نوح بص لي بشك.
“إنتِ لما بتقولي مفيش، بيبقى فيه.”
ضحكت غصب عني.
“اتعلمتوا مني زيادة عن اللزوم.”
لكن قبل ما نتحرك، سمعت صوت خطوات ورايا.
كريم.
“مريم.”
وقفت.
ما بصتش له.
قال:
“مين بعتلك الرسالة؟”
اتجمدت.
إزاي عرف؟
لفيت له ببطء.
كان واقف على بعد خطوات، وملامحه مختلفة تمامًا.
قلت:
“إنت كنت بتبص على موبايلي؟”
“لأ.”
“أمال عرفت منين؟”
سكت.
وبعدين قال:
“وشك.”
فضلت باصة له.
“إنت مش عارف أي حاجة عن وشي.”
رد بهدوء:
“يمكن.”
وقبل ما يكمل، داليا ظهرت وراه.
كانت بتبص لنا بطريقة غريبة.
“كريم، لازم نمشي.”
ما ردش عليها.
قال لي:
“أنا عايز أقعد معاكي.”
ضحكت بسخرية.
“بعد 13 سنة؟”
“آه.”
“مش هينفع.”
“ليه؟”
“لأني مش مستعدة أفتح باب قفلته من زمان.”
قرب خطوة.
“الباب ده ما اتقفلش يا مريم.”
“بالنسبة لي اتقفل.”
سكت.
ثم قال:
“أنا عايز أعرف مين خبّى عني ولادي.”
الجملة دي خلتني أسكت.
لأن لأول مرة…
كان كريم بيسأل السؤال الصح.
لكن قبل ما أجاوبه، صوت داليا جه من وراه:
“أنا.”
كريم لف لها بسرعة.
“إيه؟”
وشها كان شاحب.
قالت بصوت ضعيف:
“أنا اللي خبّيت.”
الصمت وقع بينا.
كريم قرب منها.
“إنتِ عملتي إيه؟”
داليا بدأت تعيط.
“كنت خايفة.”
“خايفة من إيه؟”
“خايفة تخسرني.”
“فقلتيلي إن ولادي ماتوا؟”
هزت راسها.
“أنا كنت عارفة إنك لو عرفت إنهم عايشين، هترجع لمريم.”
كريم بص لها كأنه مش قادر يستوعب.
“إنتِ عارفة إنهم عايشين من إمتى؟”
ما ردتش.
“من إمتى يا داليا؟!”
صرخ للمرة الأولى.
“من يوم ما اتولدوا.”
حط إيده على وشه.
وبعدين بص لي.
“إنتِ كنتِ بتعرفي؟”
قلت:
“كنت عارفة إن في حد بيوصل معلومات عني.”
“مين؟”
“ما كنتش عارفة.”
داليا بدأت تتكلم بسرعة:
“أنا ما كنتش عايزة أأذيهم!”
كريم لف لها.
“إنتِ أذيتيهم!”
“كنت بحمي بيتنا!”
“ده مش بيت!”
صوته هز المكان.